لون جديد للشخبطه

شبيك لبيك نفسك ف ايه
ايه دا جيت ف وقتك يا اسمك ايه
تعالى اقعد اقولك ع اللى انا نفسى فيه

نفسى اصحى كل يوم الصبح على صوت كناريا مزقزقه
و شمس دافيه باصه علينا مروقه
و جايبه فى اديها شويه مطر
يخلى الدنيا نضيفه مزوقه
و الكون للحظه يكون بتاعى ومن غير تريقه
تعرف بقى

- هو دا اللى نفسك تعمليه
- استنى بس مستعجل اوى كده ليه

نفسى الأيام الحلوه ما تعديش كده
عايزاها تمحى كل حاجه ملخبطه
و تعدى على ايامى اللى فاتت تمسح كل الشخبطه
و بلون جديد ترسم حاجات متظبطه

- استنى ما تسربعنيش بقى

انا عايزه كل يوم اسمع ضحكته التانيه اللى هيا
مش الضحكه الهاديه العاديه
لا ما هو اصله ليه ضحكه فرحانه وشقيه
و عيونه فيها حاجات كتير مداريه
تقدر تقولى اسراره دى ايه هيا

- لا دا انتى كده بتهزرى
- خلينى اكمل واسكت بقى

عايزانا نفرح زى عيال صغيره
عايزه احزانا تكون بعيده مخدره
و الأحلام قدامنا تكون متصوره
- ها خلاص كده
- لا بس لسه حاجه صغننه
انا نفسى ف رز بلبن
- بس كده و اهو يا ستى من غير تمن
- ما اقصدش دا انا عايزه واحد من بتاعة الحكاوى والدندنه
تعرف بقى ولا انت تعبت من كتر الشقا

أخر السطر : كل سنه وانتو دايما طيبين يا رب و تكون ايامكم كلها اعيا د واحشتونى جدا جدا جدا واسفه انى ماردتش ع التعليقات اللى فاتت
ظروف والله و مش بالحق اعمل اى حاجه
واحشتنى فاتيما وديدى مواجهات ومفروستى و ابى وكوكبها ورحيل و هبه وفيونكتها و ناس كتيره اوى
واحشتونى بجد وكل سنه وانتو طيبين

فانيليا بلون الشمس

الاحساس بالتوهه و الوحده غريب اوى بتحس كأنك فى وسط ليله برد
و بتمطر و انت واقف فى وسط الشارع لوحدك
بس حواليك ناس لابسه هدوم دافيه و ماسكه شمسيات
و انت اللى مخفف كأنك على شط اسكندريه ف
عز يوليو و حره ،لا انت عارف تستلف منهم شمسيه و لا انت عارف
تروح تقف تحتها جنب حد فعمال تجرى بتدور
على تنده او بير سلم تستخبى فيه لحد ما الشمس تطلع عليك او جايز
انت اللى لازم تمد ايدك و تشق السما عن شمس برتقانى
مدوره تدفى الدنيا من حواليك انا كان بقالى فتره بحاول اشق السما
لحد ما اخيرا لقيت الحاجه اللى نورت كل حته ضلمه من حياتى

***
اتلمينا امبارح وخرجنا
سرحت وبصيت علينا كده لقيتنا ملفوفين بجو دافى
اتكون من كلامنا وغمزنا وضحكنا على حاجه هايفه
كنا معزولين عن الناس و كانت ارواحنا مشبكه ايديها فى ايدين بعض
من غير ما نكون احنا كده، اتمنيت نفضل كده علطول
و الدنيا ما تخدناش وننسى اللى بنكون نفسنا مش حد تانى معاهم

***
"اول مره اشوفك بتضحكى ف صوره "
الكلمه دى قالهالى اخويا قلت لأنى اول مره اكون مبسوطه كده
لأول مره انسى انى بكره اتصور و كل اللى كنت بفكر فيه انى امسك اى لحظه من اللحظات
اللى عشتها بجد مش عديت عليها كده كأنها متخصنيش
وعشان كده الصوره طلعت احلى صوره اتصورتها

***
"عمرك حبيتى.... لأ كان بان عليا "
بالنسبه لى الحب دا عامل زى ما تكون دخلت حقل للفانيليا
اللى بتكون ريحتها نفاذه مثيره للأحاسيس
و بتحوطك من كل حته ومسام جسمك بتتنشقها بنهم
و بتسرى جواك لحد ما تبقى جزء من تكوينك
الداخلى والخارجى بتتعرف بيها فى اى مكان تروحه
الحب كده برده بيتعرف فى اى مكان و بيعرف عن صحابه
***

فى الأخر : بعتذر انى مردتش على تعليقات الناس وانى ما دخلتش مدونات من زمان
بس بجد انا مطحونه مذاكره يدوب بنام ان شاء الله ادخل تانى زى الأول

سلام مؤقت

دنيا الانتظار لما لا نعرفه لكننا نتمناه

رسائلي للشمس ..

تعود دون أن تمسّ !

رسائلي للأرض ..

تردّ دون أن تفضّ !

يميل ظلّي في الغروب دون أن أميل !

و ها أنا في مقعدي القانط .

وريقة .. و ريقة .. يسقط عمري من نتيجة الحائط

ترددت تلك الكلمات العميقه فى طرقات رأسى شارحة ما اشعر به فانا فى هذه الدنيا منتظره ما سيأتى بشوق وعدم صبر و ارى دنيايى
كقاعة انتظار خاصه بى يمضى الحدث لأنتظر الأخر الذى يأتى ليزحزح ما قبله
الى ركن الذكريات ويترك علامته الخاصه على صخرة حياتى
و قاعة انتظارى هى جزء من دنيا الانتظار التى نحياها دوما ننتظر شيئا ما، ما هو ،متى سيأتى لانعرفه او ربما نعرفه و لكننا
دوما نتمناه لأسباب مختلفه حتى الموت حين نكتفى من الأخرين ومن هذه الدنيا و نكمل ما اتينا لأجله
ننتظره برحابة صدر دون احساس بالخوف او الرهبه.
و انا جالسه فى قاعتى الخاصه انظر لمن حولى فى اماكنهم المجاوره لى او البعيده عنى
و احاول ان استشف ما يختبىء خلف هذه التعبيرات المنحوته على وجوه اصحابها فاجد من لا يمتلك قاعة انتظار فحياته
مشغوله دوما بشىء ما يخرج من هنا ليدخل هناك وهكذا و ان لم يكن التنفس شىء ضرورى ولا ارادى لما وجد الوقت ليفعله
فاتجه اليه بعين تأمل ان اكون مثله و عين تشفق عليه و تسأل متى سيتوقف ليلتقط انفاسه ويستمتع
بحياته التى بين يديه ام ان الموت هو ما يوقفه ؟
و ادور بعينى مره اخرى فتقع على من لا يأبه بالانتظار فالحياه بالنسبة اليه
عباره عن نهر جار و على السابحين ان يسايروا التيار
و لذا فهم لا ينتظروا شيئا بعينه و لا يسعون اليه كذلك
لذا هم سعداء بحياتهم المليئه الفارغه فى نظرى
و فى منطقه وسط ما بين اولئك و هؤلاء من المشغولين الى حد المرض و الخاملين الى حد الموت
اقبع انا و معى الكثير ممن ينتظر شىء او اشياء لتكمل لهم حياتهم الناقصه
كلوحه كبيره ينقصها الألوان و عليه يسعون اليه
كثيرا و يحاولوا و يفشلوا ليحاولوا مرة اخرى و لرغبتهم الشديده فى هذا الشىء ينتظرونه
طوال حياتهم دون الاستمتاع بها فإما ان يحصلوا عليه او ينتظروا رفيقهم الأخير
*************************
ملحوظه اخيره :فى حفل توقيع فى مكتبة بوكس اند بينز فى المنصوره يوم الجمعه الجاى"25-7" الساعه تمانيه لحد الساعه عشره تقريبا لرحاب بسام و غاده عبد العال فياريت اللى يعرف يجى يجى لأنى بجد نفسى اشوف الناس كلها

سلام مؤقت

روائح الأشياء المخبأه فى أدراج الذاكره

دوما كانت الذكريات جزءا لا يتجزأ من كيانى اجد فيها ماضى وحاضرى
و ربما مستقبلى ايضا و لكنى ايضا اتمتع بحاسة شم قويه
كالكلاب البوليسيه لذا عندما تجتمع ذاكرتى
مع حاسة الشم تنتجان ذكريات مشبعه برائحة الحنين الدافئه صباح اليوم
تلمست انفى رائحة فول مميزه تشبه كثيرا رائحة الفول الذى
كانت تصنعه جدتى لأبى و تلازمه الذكرى الوحيده السعيده معها
فأكلته وانا اهضم معه معظم ذكريات طفولتى السعيده
و بعد انتهائى خرجت من منزلى
فاذا بى اجد قطرات المطر الأولى تتساقط على رأسى
وتهبط لتلامس ذرات التراب الناعمه
فيتهادى منها عطر اثيرى اتمنى لو أعبأها فى زجاجات لأحتفظ بها معى
دوما ،فأمد يدى لأجمع فيها قطرات المطر واتأملها و امعن النظر بها فأرى
فى انعكاسها فتاه ترتدى ثوبا مليىء بأزهار الربيع تركض عارية القدمين
تتناثر مياه المطر من حولها وهناك من يلاحقها ضاحكا فيمسك
بها ويقعان معا فى الماء فأهز رأسى و مسح وجهى بماء المطر
و ابتسم لهذه البراءه التى تلاشت بفعل الزمن
وكل مايمر فى حياتى من احداث،
اسارع حتى لا اتأخر عن موعدى و اركب سيارتى و انا احاول
ان اركز على الحاضر و ليس الماضى فانظر من نافذه السياره
اجده كما كان دوما يغمرنى بالانتعاش و الحريه -لاادرى لماذا- انه حقل الأرز
حديث الزراعه المغمور بالمياه ذو الرائحه المنعشه التى تتفتح
لها مسام جسدى دون اى احتجاج
فأذكرنى وانا اسير بجواره و انظر الى صورتى المنعكسه
على مياهه الضبابيه و اندمج فى الاعجاب بنفسى
فاتعثر واسقط فى مياهه فتتسخ ملابسى البيضاء , اقف
وانا ارتجف خوفا مما ستفعله بى امى حين ترانى فاتسلل الى بيتنا فى الخفاء.
افيق من شرودى على اصوات عاليه بجوارى فانتزع نفسى من ذكرياتى
لأجد احد السائقين يصرخ بوجهى لأسرع قليلا فانطلق وانا امنع نفسى منعا
من الاسترسال فى ما افعله .
جاء جميع اصدقائى فى الموعد وكعادتنا تحدثنا
كثيرا و لكن ولأول مره بيننا نتحدث عن ذكرى عاطفيه
لا تنسى و يريدون البدء بى لمعرفتهم بذاكرتى القويه فلسبب لا اعرفه
تمر بأنفى رائحة البحر المالحه الملونه بغروب الشمس
فاخبرهم عن ذكرى اول مواجهه بينى وبين مشاعرى المراهقه الغضه
حين اعجبت بشاب التقيته صدفه على الشاطىء
لمجرد انه يشبه كثيرا ذاك الرجل فى القصص الرومانسيه
التى كانت دوما بجوار سريرى و لأن اعيننا التقت
لمده لا تجاوز الدقيقه فمنهم من تبتسم
ومنهم من تضحك و لكن كلهم يطالبوا بأن اخبرهم جميع
التفاصيل المهمه وغير المهمه و لكنى بالطبع لا افعل
فانا اريد ان احتفظ بها فى داخلى
و لتأخر بنا الوقت فتذهب كل منهم الى بيتها مسرعه واعود انا على مهل
و تمنيت لو لم املك سيارتى العزيزه حتى اعود الى بيتى سيرا
فالذكرياتتكون احلى و اصفى عندما تتذكرها وانت
تمشى بصحبتك دون ان يقتحمها احد .
وصلت بيتى ولم احتمل فاندفعت الى حجرتى لأخرج صندوق
احتفظ فيه بكثير من نفسى الزمنيه واخرج صورته
المعطره بعطره الدافىء فينتقل العطر منها ليملأ روحى و يذكرنى به
'هو' الغائب الحاضر دوما اتذكر ضحكاتنا العاليه و تلاقى اعيننا
بأحاديث جانبيه لا يشاركنا اياها احد واتذكره حين يغضبنى فأبكى
فلا يحتمل بكائى فيحتوينى بداخله فأشعر وكأن يدنا حانيه
احتضنتنى فاشعر بالدفىء اللذيذ فأنزلق الى النوم
وانا اضع صورته فوق قلبى حتى نتقابل فى الحلم.ء

ماذا بعد موت الريس؟

سؤال طرح نفسه عليا و منعا لأى سوء تفاهم متعمد من ناس معينه
انا اقصد موته طبيعيه بدون اى عوامل تعريه خارجيه الا اذا كانت دعوه طبعا .
يا ترى بقى التركه هتتوزع ازاى و الورثه هيبقوا من العيله بس ولا من الحبايب والأصحاب كمان .
لنفترض جدلا ان الورثه هما الأخوين جيمى ولؤلؤ بس يا ترى برده
هيقسموا البلد محافظات وكل واحد يختار اللى يعجبه ولا هيقوموا قاسمينها بالنص .
طيب سؤال تانى معلش هما بقى هيحكموا ازاى كل واحد هيحكم نصه
و يبنوا سور بين القسمين ونبقى زى المانيا زمان و لا هيتشاركوا فى الحكم و لا ايه بالظبط .
طب لنفرض جدل تانى غير الأولانى انهم اتخانقواوواحد فيهم حب يبيع نصيبه
هيبيعه لأخوه ويبقى يا دار مادخلك شر وزيتنا فى دقيقنا و لا هيبيعه لحد برا العيله
عشان يخنق على اخوه ويا ترى الحد دا هيبقى مصرى ولا اجنبى ولا مش هتفرق طالما هيدفع ؟
و يا ترى برده اللى هيشترى ده هيعمل فى النص بتاعه ايه هيقيم دوله خاصه بيه و يعمل نفسه ريس
ولا هيعمله مخزن نفايات زى ما بتعمل الجاره العزيزه فى سينا .
اما بقى لو هيدخل فى الحسبه الأصدقاء والحبايب هيبقى الوضع كما هو عليه
و يظبطوا هما مع بعضيهم مين اللى هيبقى على الكرسى و هما الطاقم بتاعه
و احنا بقى هنتفرج من بعيد لبعيد زى عادتنا.
سؤال تالت ولا رابع مش مهم هل المواطنين- اللى هما احنا- يعنى من ضمن التركه دى
و لا مالهمش لازمه وجودهم زى عدمه الواحد برده لازم يعرف مستقبله عشان يعمل حسابه للزمن .
أنا رأيى بقى ان ريسنا المبجل يعمل حسابه من دلوقتى و يكتب وصيته
عشان محدش ضامن عمره و ولاد الحرام مخلوش لولاد الحلال حاجه
و يقسمها بالعدل كعادته دايما يدى لجيمى المنصب وامور دولتنا العظمى
و يسيب للؤلؤ التجاره والأراضى بقى وكده و ماما سوزى تاخد نايبها كاش

و يجعله عامر

------------------------------------------------------------------------------------

( تاج الجنون )

وصلنى من احلى دعاء مواجهات حبيبة قلبى هوا تاج عن الأفعال المجنونه ، نخش بقى على اسئلة التاج
- هل سبق أن فكرت فى أفعال مجنونة؟
ايون كتير
- هل نفذت أحد هذة الأفعال؟
اه بس مش كلها شويه كده يعنى
- هل علم بها أحد؟ وما رد فعلة عليها؟
لا ما اعتقدش اصل انا اساسا محدش يعرف عنى كل حاجه و بما ان محش يعرف عنها يبقى مافيش رد فعل عليها
- ما هو إحساسك بعد أن قمت بهذة الأفعاال المجنونة؟
مش عارفه احيانا برتاح و احيان بتكسف من نفسى
- هل ندمت على فعل جنونى كاد يودى بحياتك؟
ندمت اه اظن انى اتمنيت انى معملتوش لأنى استهيفت نفسى اما يودى بحياه دى مش للدرجه دى

- هل سبق ووقفت أمام المرآة لتقول لنفسك أنك مجنون؟
لا مش قدام المرايه بس فى اى وقت بفكر فى حاجات مجنونه
إذكر أمثلة لتلك الأفعال المجنونة؟
تؤتؤ يا دو ما ينفعش دى حاجات ماتتقلش
وسبب تسميتك لها بالمجنونة وهل هى مجنونة فعلاً ولا إنت موسعها حبتيين؟؟؟
انا سميتها مجنونه لأنها مش ماشيه مع طبيعتى و حاجه غير معتاده فى حياتى انما ممكن تكون بالنسبه لحد تانى عاديه جدا فدى بتفرق بالنسبه لطبيعة الانسان
ما هى الأفعال المجنونة من وجهة نظرك؟؟؟
هى الأفعال اللى بتبقى مش معتاده بالنسبه للشخص اللى بيعملها او بالنسبه للمحيط اللى هوا عايش فيه
و بعدين كل حاجه نسبيه المجنون بالنسبالى عاقل بالنسبه لحد تانى والعكس صحيح

- ياترى هتبعت التاج دا لمين؟؟؟

هممممممممم لمين لمين

زيانور
تامر نبيل
لماضه
فاتيما القمره

سخان حياتى غاز يا ترى سخان حياتك ايه؟

تخيل نفسك كده و انت راجع بيتك بعد يوم شغل طويل و مقرف
و افضل حل عشان تتخلص من كل ما علق بيك طول اليوم
هوا شاور دافى قمت دخلت الحمام ومعاك الفوطه
انا بقى عايزاك تخرج من ذاتك المتبخره او المتجمده على حسب حالتك ،
بص لنفسك كده و انت عمال تظبط فى حنفية السخن والبارد
عشان توصل لدرجة حرارة المايه المظبوطه اللى تناسبك ،
حياتك بقى مش كده بالظبط دايما بتحاول تظبطها لا انت عايزها سخنه
و مليانه شغل و مشاوير وزيارات و كلام وسفر وزحمه وخنقه من غير لحظه هدوء
واحده احسن تلسعك وتحرق جلدك ، ولا انت عايزها ساقعه ممله وبارده
مليانه فراغ فى كل حاجه ووحده لدرجة ان روحك تتجمد جوا تجاويف قفصك الصدرى ،
انت بتكون عايزها بين البنين تدفيك فى الفصول الشتويه البارده
واللى احيانا بتكون عاصفه وممطره من حياتك و تنعشك فى صيف ايامك اللى شمسه ضاربه فى نافوخك.
يا ترى بقى بتستخدم انهو سخان عشان تظبط ماية حياتك
غاز اللى كل التأثيرات بتعاته فوريه عايز سخن موجود بارد انت تأمر
بس مشكلته انك كل شويه لازم تمد ايدك وتجرب وانت وحظك يا تطلع سخنه
اوى فلازم تزود الساقع علشاتن تكون دافيه و ممتعه توصلك لنهاية رحلة الحياه بسلام وراحه.
و لا سخان كهربها لازم تملاه قبل ماتستخدمه وتسيبه فتره على ما يسخن دنيتك
بس بعد فتره مخزون الأشياء والمواقف الحميميه الدافيه هيخلص
و هتفضل فى البارد لحد ما تملا السخان تانى وهكذا تعيش حياتك
على مراحل انت اللى بتحددها .و لا انت من غير سخان خالص حسب ما تكون ماية الحنفيه
سخن بارد كله ماشى و انت ونصيبك زى ما تيجى.
بعد انتهاء رحلة التأمل الشاوريه دى يا ريت ترجع لذاتك تانى قبل ما تستهوى
وتاخد برد و تكمل شاورك بسلام و تقولى لو سمحت سخان حياتك ايه ؟

الملك هو الملك و لو بعد طول انتظار

اخيرا نزل شريط منير بعد طول انتظار- تلت سنين او اكتر من غير جديد منير-
ذكرياتى مع امبارح كان عمرى عشرين من اجمل الذكريات فى ايام نزوله
كانت ايام فرح اختى الله اعلم ايه هتبقى ذكرياتى مع طعم البيوت مبروك لكل المنايره و ليا
المهم انطباعاتى عن الشريط بقى ايه هيا
الأول اسم الشريط روعه بيدينى احساس الدفا و الحنيه .
***************
طعم البيوت
كلمات: نصر الدين ناجى --- الحان: احمد فرحات
عجبانى كلماتها جدا جدا الكلمات بتخلينى احس انى نايمه فوق سطح بيتنا
و اشعة الشمس بتطبطب على وشى بحنيه وانى حاسه بدفا و روقان
وابتسامه مرسومه على شفايفى انما بقى كان نفسى اللحن يبقى هادى شويه
يبقى ناعم شويه عشان يمشى مع حالة الانسياب والحميميه اللى فيها الكلمات
بس الأغنيه كلها على بعضها عجبانى خصوصا المقطع ده
اللمه لما تحلى في ساعة العصارى
تفتح مزاد ع الحب تلقى الف شارى
شاهد بيفضل م البدايه للنهايه
وكل ركن ف قلبه يحكيلك حكايه
وكفايه لما بتلاقيه فاتح دراعه بيناديك
ويقول تعالى ف حضنى دا انت واحشنى موت
بس اللى عايزه اقوله صوت منير مشدود فيها اوى مش عارفه ليه
--------------------
مش محتاج اتوب
كلمات:طارق عبد الستار ----- الحان: محمد ضياء
اغنية الأغنيه لذيذه و حلوه بس معلقتش معايا حاساها عاديه
مش مميزه زى اغانى منير بتاعة زمان مش عارفه ليه
----------------------------
من غير كسوف
كلمات:نصر الدين ناجى ----- الحان:احمد الجنيدى
دى من الاغانى اللى شدتنى فى الشريط عجبنى الكلام برضه فى البدايه
يحسسك انه هيكمل فى حته وفى الأخر تلقيك وصلت لحته تانيه خالص
و دا اللى عاجبنى فيه و اللحن كمان عجبنى خاصه عند كوبليه
مشيت وياكى للاخر
اتارى اولك اخر
عنيكى خدتنى للحلم اللى مبيكملش
كلام خلى احلامى تشوفنى واشوفها قدامى
وهمتينى وخلاص مقدرش متكلمش
--------------------
يابو الطاقية

من اجمل اغانى الألبوم اغنيه بتخلينى ابتسم وانا بسمعها
و بتدينى احساس بان الحب مش لازم يبقى حزين ممكن يكون مرح و لذيذ
الكلمات والألحان للرحبانيه الكلمات جميله اوى واللحن كمان بالذات الوصله
اللى من غير كلام بس اللى عجبنى اوى طريقة منير فى غناها وطريقته ف نطق كلمة يا ابو الطاقيه ----------------------
معاكى
كلمات: مجدى نجيب -----الحان :وجيه عزيز
الأغنيه كلها على بعضها حلوه اينعم مش من الأفضل بس فى مجملها جميله
وعجبتنى كلمه معاكى بضحك بصوت عالى و عجبنى منير وهوا بيقول يا اغلى يا اغلى ما عندى ------------------------------
كان فاضل
كلمات: نصر الدين ناجى---- الحان :احمد فرحات
هاديه اوى الأغنيه دى فى كلماتها ولحنها و صوت منير فيها كان هادى
و كان صوته مش مشدود كان بيغنى براحته هى الأغنيه نوعا ما حزينه
و اللى يزود الاحساس ده طريقة منير وهوا بيغنيها بيحسسك انه غلبان اوى
من احلى اغانى الألبوم فى نظرى
---------------------
كان لزاما
كلمات: مجدى نجيب -----الحان :وجيه عزيز

كلمات الأغنيه جميله اوى اما الكوبليه اللى عجبنى بجد هوا
يالون ربيع وردى
الحزن مش قصدى دا
انا فرحى شوف قدى طارح نهار
اما مدخل الأغنيه بيقول ان اللى ملحنها وجيه عزيز و لحنها جميل جدا
-دا وجيه عزيز بقى - و منير غناها حلو اوى
-------------------------------
نيجرى بيه
كلمات :صبرى رياض /احمد منيب ----الحان: احمد منيب
الأغنيه دى زى العسل ا بجد اغنيه جميله جدا و بالذات المقطع النوبى
و كورال الأطفال زى العسل ولحن احمد منيب جامد ولذيذ
والتوزيع جميل و منير غناها بمزاج و دى تانى اغنيه مفضله عندى فى الشريط
---------------------------------
تحت الياسمينه
من اجمل ما غنى منير فى الألبوم و هيا فلكلور بس بجد تحفه اللحن والكلام ومنير بجد روعه -----------------------------
سؤال
كلمات: مجدى نجيب---- الحان :احمد منيب
كلماتها عميقه اوى الأغنيه دى بتخل كل واحد فينا يطرح على نفسه
اسئله يمكن مالهاش جواب بس لازم تتسأل
لحنها حزين بس جميل و فكرتنى بأغانى منير القديمه يا ترى منير لقى الجواب
----------------
يونس
اجمل واجمد اغنيه فى الألبوم كله دى من السيره الهلاليه لعبد الرحمن الأبنودى والحان محمد رحيم
بس بجد دى جوهرة الألبوم كلماتها جميله جدا جدا
و لحنها متكلف و متظبط و بجد جميل جدا
اما منير فيها بقى فا مش عارفه اقول عليه ايه كان متمزج وهوا بيغنيها
و تحس الضحكه فى صوته و انه مبسوط والانبساط دا يتنقلك وطريقته
و هوا بيقول يونس مفيش حد يقولها زيه بجد الكل يسمعها دى من احلى ما سمعت
-------------------------
فى الأخر الملك هيفضل طول عمره الملك

احلامى ف تاج

النهارده الواحد يقدر يقول بالفم المليان انه بقى مدون معتمد لأن وصلنى اول تاج فى حياتى التدوينيه من العزيزه أم نور وزياد اللى بحب بجد ازور بيتها و بحس بالدفا عندها .
نخش بقى على اسئلة التاج
1- اذكر 5 احلام على الاقل تخص ماضيك وتحلم فيها بتغير الاشياء .. ماذا ستعدل وماذا ستترك؟؟
الحلم الأول : دايما كنت بحلم انى اعيش بره قريتنا كان نفسى امشى منها و كنت دايما بتخيل نفسى وانا راجعاها بس فى زياره بس للأسف الحلم دا ما اتحققش لكن انا وراه وراه
الحلم التانى: كنت بحلم انى اتجوز واقعد فى البيت زى بقيت الناس اللى كنت بشوفهم والحلم دا فضل فى دماغى لحد فتره قريبه سنتين تلاته بس
دلوقتى خلاص انا عايزه اشتغل واعيش مع نفسى فتره كده قبل ما الجواز بس الله اعلم ايه اللى ممكن يحصل
الحلم التالت :كان نفسى اسافر ايطاليا بحبها جدا مش عارفه ليه ونفسى بجد اشوفها و الف فى شوارعها وأكل اكلها بس لسه برضه معرفتش اسافر لأن لازم ما اسافرش لوحدى لازم يبقى معايا ابويا و جوزى بس الله المستعان
الحلم الرابع : كنت بحلم ان اخوات بابا يتغيروا ويبقوا كويسين ويقدروا اللى عمله عشانهم ويحترموه ويعرفوا قيمته و يعرفوا قد ايه ضحى عشانهم بس هما فضلوا زى ماهما خدوا اللى هما عايزينه منه وبعدين مابقوش يكلموه... اخوات استغفر الله العظيم
الحلم الخامس : كان نفسى اوى اشوف اختى مخلفه و الحمد لله خلفت احلى بنت واحلى ابن فى الدنيا انا مش متخيله حياتى من غيرهم انا لما بشوفهم قلبى بيطير من الفرح و احلى ضحك بضحكه لما بشوف حركاتهم..... ربنا يخليهم لها
2- اذكر5 احلام على الاقل تخص مستقبلك
اول حلم نفسى اخلص الماجستير والدكتوراه بتاعتى بسرعه فى خلال تلات سنين و ارتاح بقى
تانى حلم نفسى الف الدنيا كلها حته حته واخد صور لكل مكان واحتفظ بذكرى لكل حاجه وبعدين بعد ما اخلص لف اجيب الصور وا قعد افتكر كل حته مريت فيها وافتكر انا عملت ايه هناك
تالت حلم نفسى لما اتجوز اتجوز حد بحبه اوى وبيحبنى اوى و احس معاه بالأمان ويكون بيراعى مشاعرى ونخلف عيال زى العسل
رابع حلم نفسى بابا وماما و اخواتى واصحابى واى حد اعرفه ربنا يبارك فى عمرهم و يديهم كلهم الصحه و يفضلوا حواليا علطول
خامس حلم نفسى لما اموت ان شاء الله اكون كفرت عن ذنوبى على قد ما اقدر واكون حافظه القرآن ...يا رب ادعولى بقى

3- اذكر شخصين على الاقل متواجدين في حياتك حاليا كنت تود وجودهم قبل الأن بزمن..
همممممممممم مين مين مين !!!!
اول حد ولاد اختى لأنهم بجد احلى حاجه فى حياتى دلوقتى
تانى حد هوا مش حد يعنى هيا المدونه بتاعتى عشان هيا شباكى على الناس و عرفت منها ناس زى العسل و لسه هعرف تانى وبنفس فيها عن نفسى
4- اذكر شخصين على الاقل غير متواجدين في حياتك حالياً كنت تود وجودهم الآن أو في حياة اولادك مستقبلاً..
جدى الله يرحمه ابو بابايا كان نفسى اعرفه بجد اوى من اللى بابا بيحكيه عنه كان حد جامد اوى رغم انه كان بسيط بس كان مثقف ونفسى اشوف اللى ربى بابا كان بيفكر ازاى
جدتى الله يرحمها مامت ماما كنت بحبها اوى بس ماكناش قريبين من بعض يمكن لأنى كنت مشاغبه من بره ومنطويه من جوا كان نفسى تكون معانا دلوقتى
***************
ياه ايه ده خلص بس على فكره حكاية التاج دى حاجه لذيذه اوى بتخلينا نعرف بعض بجد و الواحد يقعد يفضفض كده
المهم بقى انا امرر التاج دا لمين ما ينفعش ام نور طبعا لأنى واخداه منها
ديدى مواجهات حبيبه قلبى
هبه المنصورى
مى بهاء
وائل كلام كتير
واحده مفروسه
و اى حد عايز التاج ياخده براحته

و احلى سلام منى

شجرة الصفصاف

منذ كنت طفله كانت تبتدأ الأجازه بنهاية الامتحانات و لكن اجازتى كانت تبتدأ
حين أزور شجر الصفصاف المهيب الجاثم على جانبى المروى ذا الماء الأخضر
-كان دوما يحيرنا من اين يستمد لونه اللامع -الذى كان يروى قطعة الأرض
الصغيره التى كنا نملكها على اطراف بلدتنا .
فكنا انا وصديقتى الحميمه آنذاك مع نهاية كل امتحان نذهب بدون ان يدرى بنا احد الى
مكاننا المقدس بجوار شجرة الصفصاف المفضله لدينا ذات الأفرع الطويله المتدليه
التى تلامس اوراقها سطح الماء برقه وحنان كأنها تخشى ان تعبث بسكونه.
نذهب و ايدينا محمله بالحلوى والبنبونى و الشكولاته
و يبدأ طقسنا المعتاد من حديثنا عما يمر يحياتنا القصيره
وتمتزج قهقهاتنا السعيده بأصوات اقدامنا التى تتلاعب بالماء
و الهواء المار بين اوراق الشجر يصدر صوت منعش لذيذ الوقع
و تحاول كل منها ان تصطاد كائنات تشبه الأسماك لكنها صغيره و شفافه جدا
و مع انتهاء ما حملناه معنا من زاد تنتهى رحلتنا لهذا اليوم م تعود كل منا الى بيتها
مع وعد صامت باللقاء فى نفس المعاد غدا تحت شجرة الصفصاف

غريب

عدت يا وطنى
عدت غريب
غير ان العمر
قد تبعثر فى الطريق
عدت اليك
بعد طعنات السنين
و القلب جرحًُ
كم فيه من صديد


جئت اليك
انت يا وطنى
الطبيب
غير انى قد صدمت
و ضاع ما تبقى
من سنين
كيف تداوينى
و انت يا وطنى مريض؟


عدت اهفو لأحضان حبيب
جئت ابحث عن صديق
فوجدت ان ما عاد فى وطنى حبيب
و الصداقة انتهت منذ عهد بعيد


كنت هناك احلم
بالطرقات و الليل الحزين
كت احمل بين جنباتى حنين
لوجوهٍ اراها بين حين وحين
و اليوم تاهت الطرقات منى
و اصبحت الوجوه ذات طبع بغيض


كم كنت احكى
عن ايامى السعيده
فى وطنى البعيد
ضحكات الطفوله البريئه
و قصائد حبى الاول
على شاطىء البحر الغريق

و اتيت احيى ذكرياتى
و جدت انا ما احييه
رحل بعيدا
آخذا ما تبقى من عمرى السقيم


و الان عفوا وطنى
فسوف ارحل عنك
دون احداث ضجيج
لقد عشت فى لياليك حزين
و قد حان وقت الرحيل
فالموت مغتربا فى بلد بعيد
اهون من العيش بين احبابى وحيد

كلمه : ملقيتش حاجه اكتبها فكتبت دى

هنفضل لحد امتى شحاتين

حيث ان مامتى وبابايا بيشتغلوا فى التربيه والتعليم
- اللى مش نافعين فى البلد دى -
فالتلاتين فى الميه دول يخصوهم فأول ما سياده الرئيس اللذيذ قال عليهم
فرحوا اوى وقعدنا اتكلمنا بقى ع اللى بيحصل فى البلد و طبعا جت سيره التلاتين فى الميه
تانى و قعدوا برضه يقولوا الحمد لله و نعمه و احنا كنا نطول وأى حاجه
أحسن من مفيش كأن الحكومه دى بتمن عليهم و لا حاجه
دا غير ان مع الزياده الوهميه دى المرتبات مش مكفيه اى حاجه لا ضروريات
ولا كماليات ولا تعيش اى بنى آدم بصوره طبيعيه وكل الناس بقت ماشيه بالزق
-انا بتكلم على الناس اللى زينا مش العالم الخياليه اللى فى الدور اللى فوق -
اللى انا عايزه أعرفه بقى هو ليه الناس بقت شايفه ان حقوقهم دى منحه ولا منه
من الحكومه وان اى زياده تبقى الحكومه دى ميت فل واربعتاشر
واننا اللى ظلمه ومفترين واننا جيل متشائم وعايز الحاجه ع الجاهز
هيا الناس دى ساكته ليه ايه حلو ف حياتهم عشان يسكتوا ايه هيا القوه دى اللى مسكتاهم
هوا إحنا هنفضل لحد امتى نشحت حقنا من الحكومه اللى المفروض انها بتشتغل عندنا
و هيفضلوا لحد امتى بقى يجبوا علينا كأننا أجريه فى العزبه بتاعتهم ،
الله يرحمنا بقى لو فضلنا كده ويبقى نستاهل اللى جرالنا الفاتحه لو سمحتم .ء
------------------------------------------------------------------
كلمه أخيره بمناسبه الوضع فى لبنان النهارده فى احدى التحليلات بيسألوا المتحدث
باسم وزارة الخارجيه المصريه عن دور مصرفى حل ازمة لبنان و موقف مصر وكده يعنى .ء
موقف ايه بقى اللى هما بيتكلموا عنه مش لما مصر تحل مشاكلها ومشاكل مواطنيها يبقى
ليها دور فى حل امور البلاد التانيه عامل زى الراجل اللى مش عارف يحل مشاكل بيته
قام راح يحل مشاكل الناس التانيه بلا خيبه .ء

و سلام مؤقت

ايه يا بلد

ايه يا بلد
مش ناويه تفكيها ولا ايه ؟
نقابلك فى سكه
تهربى م التانيه ليه ؟
نجرى عليكى نحضنك
وحشتينا ......!
ترمينا تحت رجل سعادة البيه
ايه جرالك يا بلد
ما بقيناش ولادك و لا ايه ؟
هوا الفقير عندك بقى اخييه
و الغنى يا محلاه الله عليه
ألا قوليلى يا بلد
هوا انتى قاسيه علينا ليه ؟
متبهدلين ومطحونين
جوا حواريكى
مستنينك تواسينا
نلاقيكى بتبعدينا ليه ؟
نتعب م اللى بيجرالنا
نهرب منك بعيد
و نلتفت نلاقيكى تنادينا
تبكى و ليكى تشدينا
تخطفى قلوبنا و نرجعلك
ندفن همومنا جوا اراضيكى
نشتاق لأحلامنا اللى مرسومه فى عنيكى
و كل مره نتعب ونهرب
نحن ويرجعنا حبنا ليكى
و بإديكى تلمينا تانى حواليكى
يا حبيبتى .ء

احلامى

دايما احلامنا بتنبع من عقلنا الباطن يعنى انا مثلا لما بفكر فى حد كتير جدا بيجى فى الحلم واظن كلنا كده
و احيانا اضايق من شخص ما لأنى حلمت بيه حلم وحش واحب شخص جدا واتمنى اشوفه لأنى حلمت بيه حلم جميل
بس انا دايما فى حلمين بيتكرروا معايا من غير ما افهمهم ولا اعرف بيدلوا على ايه ولا يمتوا لعقلى الباطن بصله
اول حلم
"احلم دايما انى ماشيه حافيه و ابص على رجلى ومكسوفه اوى من انى حافيه وحاسه ان الناس بتبص عليا بس الحقيقه ان الناس مش واخده بالها
و كل اللى بعمله فى الحلم انى بدور على جزمه او اى حاجه البسها فى رجلى واحيانا الاقي واحيانا لأ
و بعدين اصحى من غير الجزمه طبعا"ء
تانى حلم
" الحلم دا بيتكرر كتير انى راكبه عربيه وانا عارفه انى مش بسوق كويس بس العربيه بتمشى
و احيانا اكون كبيره اوى على العربيه و محشوره فيها واحيان تانيه بكون صغيره جدا لدرجة انى مش واصله للفرامل"ء
مش عارفه ايه علاقة الحلمين دول بحياتى وهل يا ترى فعلا الأحلام ليها مدلول فى حياة البنى آدم او بتأثر
ولا مجرد رغبه الانسان فى معرفة ما لايملك ان يعرفه ومحاوله للتواصل مع الغيب
معظم احلامى سعيده بس دا مايمنعش انى حلمت احلام ما اتمناش انى افتكرها بس لللأسف ما بنسهاش
او انى جت لى فتره كان النوم بالنسبه لى هو الاحساس بانى غمضت عينى وفتحتها من غير اى احداث فى النص
بس الأحلام بالنسبه لى حاله فريده بستمتع دايما وانا بحلم يمكن لأنى بتمنى حاجات كتير فبتقابلنى فى احلامى
او لأنى فى بعض الأحيان اجد السلوى فى احلامى
فماذا عنكم ؟

عبقريه حكومه

على مدى الفتره الماضيه والحاضره الناس بتتكلم عن ازمة رغيف العيش خاصة
بعد الحل العبقرى الذى قامت به حكومتنا المصونه
من احترام كينونه المواطن المطحون اللى زى حلاتنا
من ان المواطن يقعد فى بيته متهنى و عامل العيش -معرفش بيسموه ايه -
هيمر على كل بيت ويسلمه حصته من العيش
لكن ولأننا فى مصرنا المحروسه حدث ما يخالف ذلك واليكم ما يلى
اليوم الأول :سلموا كل بيت بطاقه بمبى - والحياه بقى لونها بمبى وكده يعنى -
و بها خانات الأيام المفترض فيها استلام العيش
و توسمنا خيرا فى الخطه العبقريه التابعه للحكومه
اليوم التانى : بدايه تسليم العيش - حيث كل منزل سيحصل على حصته من العيش ليومين
و هكذا - و فعلا اتى شخص ما وسلمنا العيش بعد دفع سبعه جنيهات ونصف
- ليه لم اتوصل الى حل المسأله بعد- و اكلنا العيش بالهنا والشفا
اليوم الرابع : فى موعد تسليم العيش انتظرنا..... وانتظرنا .......
و اذا بنا نسمع من ينادى على العيش و انظر من النافذه اجد العيش مرصوصا
على احدى العربات المحاطه بطوابير الناس التى تريد ان تأكل عيش
وعليه اسرعت لأحصل على حصتنا من العيش
اليوم السادس : انتظرت فى الشارع موعد التسليم -كأننا بنسلم ونستلم مخدرات -
و انتظرت انا و اهل الحته و لم يأت احد ليسلم او لينادى على العيش
و عاد الوضع كما هو عليه و كأنك يا ابو زيد ما غزيت
-------------------
و قعت يدى بالصدفه على احدى المقالات التى كتبها وليد كساب فى جريدة
الدستور العدد الأسبوعى 5-9-2007
كان عنوانه "فلسفة التباين عميق المغزى ذى المضمون الجدلى العنيف فى وضع الجزم فى فتارين فاميه بتلمع و وضع العيش على الرصيف "
فى نهاية المقال طالب وليد كساب "بأن يتم تكريم كل جنس العيش
و يكون كله بطوابير مش ابو شلن بس وأعتقد ان حكومتنا النظيف
تسعى من اجل تحقيق هذا المطلب " اظن يا وليد ان الحكومه النظيفه اللطيفه بتاعتنا
نجحت فى مسعاها و اصبحت مصرنا عباره عن طوابير العيش
و كلنا واقفين مستنين دورنا
عن اذنكوا بقى الحق اجيب العيش

سلام مؤقت

اغضب

اغضب ايها الكائن المسمى شعبا
اخرج عن صمتك الردىء وقل شيئا
لقد كنت للأخرين مثلا
فى العزة والإباء رمزا
لقد صنعت فى ماضيك اشياء عجبا
هل بات هذا الجسد المسجى بلا روحا
هل وجد ابناؤك فى الخوف امنا
و فقدوا للأخلاق معنى
هل امسيت هيكلا مرتعشا
لا تقوى على ردع الظلم ابدا
اغضب..ارسل صوتك فى السماء مرتفعا
فجر براكين غضبك لهبا
حطم كل فاسد ولا تذر منهم احدا
اعد الروح لهذا الجسد المليىء ندبا
انهض من سباتك قبل ان تموت قهرا
قبل ان اموت انا حزنا
لا تخذلنى كما خذلت ابائى قبلا
اعطنى فى الحرية املا
لا تدعنا نبيعك ارضك غصبا
و نهرب مما يسمى وطنا
فان لم تفق و تصير يقظا
سأبحث عن شعبا مختلفا

4 مايو

اضرابنا القادم يوم الاحد 4 مايو
هاندى فرصه للحكومه لغاية ميعاد الاضراب القادم لتنفيذ مطالبنا المحدده و المشروعه

1- حد أدنى للأجور لكل الفئات و الوظائف و ربط الأجور بالأسعار كما يحدث فى جميع الدول التى تعانى من الغلاء

2- اجراءات حقيقيه لوقف ارتفاع الاسعار و منع الاحتكار

3- الافراج عن جميع المعتقلين

مطالبنا محدده و الحكومه تقدر تنفذها لو تخلت عن المصالح الشخصيه لرجال الاعمال القريبين من السلطه

مطالبنا سهل تنفيذها لو صناع القرار فى مصر نفذوا كلام علماءنا و باحثينا و مفكرينا
عندنا حل لكل مشاكل مصر ... لكن الحزب الحاكم بيتجاهلها لأنها ضد مصالح رجال الأعمال ... اللى هما الحكومه و المقربين منها

اضرابنا القادم هايكون انجح و اقوى و اقل فى الخساير

--------------------------

---------------------------------
ما تم الاتفاق عليه من وسائل سلميه للإحتجاج و ايصال رسالتنا لصناع القرار
اختار ما يناسبك من الاختيارات التاليه حسب ظروفك

1- الاجماع على تعليق علم مصر فى البلكونات و رايات سوداء و اى لوحات او لافتات تتضمن مطالبنا البسيطه

2- الاجماع على ارتداء ملابس سوداء و يفضل مطبوع عليها مطالبنا المحدده المذكوره بأعلى هذه الصفحه

3- تم بالإجماع الاتفاق على الإضراب عن شراء أى سلعه لمدة 3 ايام " و خصوصا اللحوم و الدواجن" لتمثل وسيلة تهديد للحكومه التى لا تعيرنا اى انتباه و لا تحترم وجودنا ولا تحس بمعاناتنا و كذلك الاضراب عن شراء السلع يعتبر تهديد لاى تاجر يرفع الاسعار اننا يمكن ان نتحد لمواجهته
عند حدوث حالة شلل فى هذا اليوم سيفكر الجشعون الاف المرات امام هذا الشعب الواعى

4- تم الاتفاق على ان يحاول الجميع قدر استطاعته بكل السبل البقاء فى المنزل فى يوم الإضراب مع تعليق لافته على باب منزله بمطالبنا المشروعه

5- لإصحاب المهن الحرجه كالطبيب مثلا أو ما شابه و كذلك لمن لن يستطيع ابدا ابدا ان يبقى بالمنزل و كذلك بالنسبه للطلبه الذى يتوافق يوم الاضراب القادم مع امتحاناتهم فإنهم سيضطرون للذهاب لمصالحهم مع اعلان الاضراب لبعض أو كل الوقت و كذلك الاعتصام السلمى فى مجموعات إن امكن و يفضل ارتداء ملابس سوداء مطبوع عليهامطالبنا

6- نظرا لأن حكوماتنا فى مصر لا تعرف سوى بالحل الامنى
و نظرا لان صناع القرار فى مصر لا يعرفون سوى إرهاب الشعب و زرع الخوف كحل لجميع المشكلات
لذلك فإننا قررنا البحث عن وسيله لا تستغلها الحكومه كسبب للإعتقال و الترهيب
وسيله متحضره امنه لا يندس فيها بلطجية وزارة الداخليه المأجورون للتخريب و الدمار
و سيلتنا هذه المره هى ان يقف كل مواطن امام باب العامراه و فى يده لافته بها المطلبين الاساسيين لنا
و ان لم تستطع امام باب العماره" يعنى مكسوف او كده" ممكن تقف فى البلكونه و معاك يافطه فيها مطالبنا

7- على الجميع العمل الجاد منذ اليوم حتى يوم الاضراب القادم على نشر كل تلك الافكار بين الشعب المصرى و هم اهلنا و اصحابنا و اقاربنا و زملائنا فى العمل مستخدمين فى ذلك كل الوسائل المشروعه من دعوات صريحه عامه او فرديه او ارسال رسائل محمول او مكالمات هاتفيه او البريد الالكترونى و المنتديات و المدونات و المواقع الاعلانيه و الجرائد و الصحف و المجلات و الاتصال بالفضائيات .. و كذلك تعليق الالافتات و ارتداء تى شيرت أو شاره يحمل الدعوه للإضراب من الان حتى ميعاد الاضراب
و على طلاب الجامعه نشر كل تلك الافكار بين اصدقائهم و زملائهم و محاولة النشر بكل الوسائل السلميه

8- طبقا للمناقشات اجمع معظم اعضاء الجروب و ايضا خارج الجروب على أن يوم 6 ابريل هو البدايه و ليس النهايه و ان يوم 4 مايو هو الخطوه الثانيه .. و أننا سنستمر فى كافة صور الإحتجاجات بعد يوم4 مايو لنستطيع نشر الفكره لأكبر عدد و إجبار الحكومه و صانعى القرار فى مصر على الانصياع لرغبة الشعب

9- لا تنسوا الدعوه للافراج عن المعتقلين
لتكن دعوه عالميه
الافراج عن المناضلين

و الله الموفق
الله .... الوطن
-----------------------------------------
هذا هو نص ما يطلق عليه بيان لجروب الاضراب على الفايس بوك
اظن ان شاء الله ان هذا الاضراب سوف يكون منظم عن سابقه
لأن الناس اصبحت تعرف الأن الطرق التى يمكن بها تجنب -حجج -الأمن
لتلفيق تهم الشغب و العنف الى المواطنين
لكن ما يثير استغرابى هو رغم ما حدث فى اثناء الاضراب والفتره التى تلته
من افتراءات الأمن و ما رأيناه فى المحله واستمرار حالة الغلاء و المهانه التى يغرق فيها المواطن المصرى
ان كثير من الناس ضد فكرة الاضراب و يرون انها فكره سيئه او بمعنى اصح ناس كتير - كشت-
لا ادرى لماذا او ما الذى يحتاجه هؤلاء الناس ليفيقوا او ليتحركوا
كلما جلست مع نفسى لأفكر و اقول ماذا لو تخلصنا من هذا النظام الهرم الفاسد
هل يا ترى سنتغير او سينصلح حالنا
تجيبنى نفسى بلا لأن معظم الناس فى مصرنا اصبحوا اقرب الى الجانب السىء منهم الى الجيد
الفساد والنفاق اصبحوا كالمرض الخبيث الذى استشرى فى جسد ضامر مريض
و لم يعد ينفعه الشفاء الا بمعجزة من الخالق
فأستمر فى التفكير عن فتحه صغيره تدخل الضوء الى الحالة المظلمه التى نعيشها فلا اجد وافقد الأمل
و كل ما اتوصل اليه هو الهجره والسفر بعيد
اظن هذا نوع من الاستسلام والضعف لكنى قد سئمت الزنزانه الضيقه التى نعيش فيها .

سلام مؤقت

شيبسى بالطماطم

فى احد الأيام جاءتنى أمى تقول " يا برقوقه روحى هاتى كيسين مكرونه من عند محمد البقال"
فذهبت ولم يكن بنيتى شىء مما سيحدث بعد ذلك
وحين وصلت الى المحل و طلبت ما أريد ذهبت أم محمد بداخل المنزل
لتأتينى بالمكرونه لأنها لم تكن بالمحل و لم يكن هناك احد يشترى سواى
واذا بى انظر من حولى فأجد كيس شيبسى بالطماطم
- أعترف انه أحد الأنواع المفضله لدى -و كان الكيس يحمل صورة طماطمايه كبيره ذات لون احمر شهى
تدعونى لأخذه و أتلذذ بما فيه فتلفت حولى كاللصه -كأنى لست بواحده-
و مددت يدى الصغيره و التقطه و نجحت ولم يرنى أحد.
"كده حرام وعيب "هذا ما حدثتنى به نفسى بأن ما افعله حرام و انى سأدخل النار لما فعلت
و وجدتنى اعيده مكانه رغم أصوات الاعتراضات الصادره عن بطنى
قبل ان ياتى احدهم ويرانى.وعادت أم محمد من الداخل
و لم تدرى عن الأمر شيئاً خاصة بوجود ابتسامتى البريئه التى لا توحى بأنى مشروع لصه
- ومنذ تللك الحادثه لم اسرق مجدداً لكن على الاعتراف بأننى خططت
اكثر من مره لسرقة كيس قلبظ او واحدة جيرسى
الا اننى لم انفذ اياً منها لأن ضميرى لم يعد يثق بى وظل مستيقظا تحسباُ لأى شىء-
و عليه عدت الى أمى كالحمل الوديع أحمل ما طلبته منى لتطبخ لنا
اكلتى المفضله مكرونه بصلصة الطماطم فإذا لم احصل على هذة
الطماطمايه الكبيره المغويه فى الشيبسى فلأحصل عليها فى المكرونه وبالهنا والشفا .

هو

كعادته يجلس هادئا بالخلف فى ثنايا قلبى كل حين أتذكره
و اتذكر إبتسامته السعيده و صوته المخملى الدافىء .
كل من أتى الى عالمى يذهب دون عوده
أما هو منذ أن ألتقيته كان يذهب و ربما يتأخر فى العوده ولكنه دوما كان يذهب ليعود
لكنى لم أظن أو أتمنى أن أحبه أو أتوهم أنى أحبه كما حدث مع من سبقه
، كنت دوما أحتد حين يتحدث أصدقائى عن كونه مهتم بى أو أننا نتناسب كقطعتى أحجيه
و حين نكون معا لا أعيره إنتباها على الرغم من كونى أشعر بسعاده خفيه
لإهتمامه بى و تزداد سعادتى بملاحظه اصدقائى لذلك
و مع الوقت كان إعجابى به يتنامى كان كالشمعه التى اخبئها بين جنباتى
حتى لا تهب عليها نسمه هواء فتنطفىء
إلى الأن لا أدرى لم أعجبت به أو ربما أحببته لا أدرى.
لعل السبب أننا ولدنا فى اليوم نفسه
لعلنا نتشابه كما يظننا الأخرين لا اعرف
و لكن ما عرفه أنه الأن عاد يدق على باب قلبى مرة اخرى
فهل أفتح بابى و أنا لا أدرى هل هو يحبنى حقا أم أن ما يحدث هو سراب فى صحراء حياتى؟
أم أغلقه حتى إشعار آخر؟

(1)مغامرات برقوقه

فى بلدتنا ان تمشى حافيا شىء لايستدعى الانتباه على ما اتذكره كانت عندما تمطر السماء كان معظم الناس تخلع الجزم وتحملها وتمشى حافيه
لأن الجزمه تكلف مالا اما القدم فمجانيه وسهلة التنظيف لذا قررت قرارا حاسما ان امشى حافيه ولو مره وفى حياتى
لذا ذهبت الى محل البقاله الذى يبعد عن بيتنا ما يقرب من خمس الى ست شوراع بلا جزمه او شبشب وكنت امشى متخفيه كالمخبر او اللص اتلفت ورائى واشعر بأن كل العيون تنظر لى ومن حظى السعيد دست على قزاز مكسر -يا حلاوه- واتعورت وكملت المسيره الى المحل ودمى الخفيف ينقط على الأرض واشتريت ما ارغب وانا واقفه على رجل واحده ثم رجعت بيتنا وانا أضرب نفسى بالجزمه لأنى لم البسها ومن هنا قررت قرار حاسم ايضا بانى لم ولن ولا يمكن ان امشى من غير جزمه اوشبشب فى حياتى
اظن انى تعلمت ان ليس كل ما يفعله الناس صحيحا او يناسبنى .

هى

تملأ نسمات صوت فيروز الغرفه بغيمه من الألحان الحنونه ومعها جلست هي تحوطها ذكريات عمرها الصغير
فهى لم تقضى على هذه الأرض سوى بضع وعشرون سنه -ما زالت صغيره -
لكن ما تحمله من ذكريات كثير و كثير .تجلس على سحابة عمرها لتنظر من عليائها الى أولى خطواتها فى الحياه
و تتمايل ما بين الماضى والحاضر مع انغام الموسيقى فذكرياتها هى الفرع الوحيد المورق فى شجرتها تستمد منه ابتساماتها
، شقاوتها ،دموعها ، امالها و قوتها لتواجه الحاضر المليىء بالألام فتتخذ من ذكرياتها مخدر لتقوى على التمسك بالحياه
لـتأمل بأن يأتى اليوم الذى تستطيع فيه الضحك كما كانت الطفله الصغيره ذات الضفائر المتطايره مع الرياح المعطره بنسيم الطفوله البرىء
و تسير فى حقول ذكرياتها و تعدو و تعدو حتى تتوقف نسمات فيروز عن الهبوب فتعود متكاسله من ذكرياتها
فتمد يدها الى الكاسيت وتعيد الصوت للحياه و تغلق عينيها وتغوص فى اعماق اعماق الذكريات

العصفور و الشجره

فى مسلسل كورى كنت اتفرجت عليه - اصل انا بحب المسلسلات الكورى اصلها كلها حب وكلام من ده وانا بحب الحاجات دى موووووت - المهم كان البطل سأل البطله لو اتولدت تانى تحبى تكونى ايه قالتله شجره عشان ما ابعدش عن اللى بحبهم انا بقى لو اتولدت تانى عايزه ابقى عصفور صراحه انا مش عايزه استنى لما اموت واتولد تانى انا عايزه اكون عصفور دلوقتى قبل النفس الى خرج ما يرجع تانى ، نفسى اعمل حاجات كتير نفسى اسافر - لوحدى - بس المشكله انى بنت آآآآآآآآآآآآآآآآآآآآآآآآه انا عمرى ما شفت كده ، الكل عارف ان ازاى البنت تسافر لوحدها
المصيبه كمان ان الولد لما يجى يفكر فى مستقبله بيفكر فى نفسه بس اما البنت لازم بيبقى فى عامل تانى "جوزها " و اذا ما كانش جوزها يبقى اخوها او ابوها تيجى تقول اسافر للأ لازم اعمل حساب جوزى يا ترى هوا كمان هيبقى عايز يسافر اه طب عايزه اعمل كذا تؤتؤ استنى يمكن جوزى ما يرضاش دى بالنسبه ليا مشكله نفسى اجرب اعيش لوحدى فتره يمكن تبقى ممله يمكن تزهق بس انا نفسى اجرب
نفسى افرد جناحى و اطير وانزل على الشجر اللى بحبه وابعد عن اللى مبحبوش واعشش جنب الورد والعنب والفراوله مش جنب الحشيش
يوووووووووووه نفسى فى حاجات كتيييييير . يا ترى هقدر اعملها ؟